2014年4月23日星期三

終於完sem了!(......其實未完)

18/4/14 完Sem終於見到晴天

幾經辛苦,終於捱到今個sem最後一日,依家唔駛返學,時間就多好多了,就算啲野未做晒都唔緊要,可以慢慢黎.
本來只係輕輕抒發下完sem的感受,諗諗下不如順便總結一下今個sem啦.

cost accounting,比上個sem的financial accounting一樣咁難,而且啲數字比之前更煩亂,我諗我都搞唔掂.
finance,midterm前讀得好輕鬆,midterm後就完全唔明讀唔入腦,無乜心機,都唔知啲terms點解.
不過anson已經教得好清晰好易明,自己出textbook,好有heart,可能是我遇過最年輕的lecturer.
human resource management,揀中文班就可以輕輕鬆鬆上lecture,見識了商科同學純熟的美指技巧,將ppt整到有咁靚得咁靚!

major以外,我繼續我的journal生涯,今個sem學既係傾向business.
public relations writing,學寫文,寫篇見得人出得街的文章,本來個course係幾有意思的,不過個professor講書速度就極之慢,將節奏拖得勁慢.
最慘係超過兩個半鐘的課堂,竟然一個小休都無,嘩真係超痛苦,好悶又好攰,坐lecture hall,對腳頂住前面排凳,sosad.
其實第一堂sit果陣已經feel到好悶,但因為assessment scheme只有三個writing test,無participation無project,完全適合我,所以堅持讀落去.
但呢種教學模式似乎不受國際生歡迎,本來第一堂有成四至五個外地生,adddrop後只剩下一個而已.
不得不提writing test的形式,很搞笑,係俾我地用整堂時間,兩個幾鐘,用電腦(或手寫)寫篇文,我都未試過咁樣考試.
時間是絕對充裕,反而問題係電腦唔夠電囉大笑,我都算好彩,三次tests,都剛好用盡電量,唔駛再充電就交到貨,但都幾刺激。

另外,reg了IMC,即是綜合市場傳播導論,講師是曼秀雷敦亞太區Marketing Director,營銷市場鉅子徐緣.(呢個title會否太誇haha)
其實未reg之前都有留意開徐緣在facebook的updates,佢係主場新聞其中一個台柱,經常分享不同品牌有趣的營銷策略.
上年暑sem,好多商科學生reg了佢既班,一致好評,如果夠cre的話我上年都reg左,就唔駛等大半年到依家.
anyway,能夠成為佢既學生,我都好開心,我覺得佢作風同一般大學教授完全不同,很energetic,可能因為佢把聲有少少高key,所以聽落很醒神,就算夜晚上堂都唔會眼瞓.
佢唔會focus於教授書本的理論,反而會透過大量的marketing例子去啟發我地思考,讓我地學習marketers的思考模式.
最尾最重要一part的presentation,雖然佢幾乎完全turn down我地個plan(希望唔會爛grade,佢第一堂講過話派grade架),但佢既point都係有道理的,我樂意接受佢既意見.
其實佢真係有料,對於部分組別,佢係可以「突破盲點」,真係唔係一般人考慮到,但又真係好正路好中point,真係唔到你唔服.
另外很享受做果份brand analysis的功課,揀選了海洋公園哈囉喂做分析,幾有趣.
我做journal既paper assignment愈來愈努力,因為我已經唔當作一份功課,我已經當做寫blog,因為成個過程都唔痛苦,又好玩.
有點唔捨得徐緣的lecture,但諗起唔駛再返夜晚,唔駛追尾班車巴士,唔駛逼住每星期食新亞canteen,我就很歡喜.
本來都想買本新書《型銷》留念,但發覺價錢實在太貴,結果我在書局睇了一半了,嘻嘻.
(P.S.:再次多謝徐緣在第一堂所送的潤唇膏,yeah~)

最後,今個sem仲讀了logic,開頭關於文字語言符號的部分,真係聽唔明.好彩之後學果啲容易理解得多,結果midterm考到個分令我很surprise,努力是沒有白廢的,果啲頹友繼續走堂唔聽書做墊底啦.

大概就係咁,雖然唔駛返學,但仲有一份project一份indivual case study要搞,月尾仲有final,但起碼依家可以回一回氣,打番篇blog,抖一抖再出發去傾pro!

10169432_10202570478198021_9171214473601380498_n.jpg

1010220_10202583423361642_7986230029069415190_n.jpg

  20140109_213209.jpg  

繼續閱讀

2014年4月20日星期日

香港電影金像獎2014

16/4/14 陰

其實我就唔係電影發燒友,咁多年來睇香港電影金像獎,都係搭單睇,因為電視播先會睇.
當中好多戲我都未睇過,亦唔識得睇,睇唔明,所以我都無乜點睇金像獎,通常等到最後先會睇邊個做影帝影后.

不過,今年有所不同,我早一兩個星期已經期待要睇金像獎,因為今年香港電影實在很出眾.
而且舊年我的確睇左唔少香港電影,都有不少心水,希望可以得獎.
其實全年最實至名歸就係三套片,一代宗師,激戰,狂舞派.
而我就獨愛掃毒,最愛劉青雲.雖然我心知唔會得獎,但難得真係有幾項提名,我都會奢望真係可以有份.

不過,可惜丫,正如大家預期,一代宗師,大熱之作,狂掃十二項獎項.
呢套戲花幾年時間製作,的確是誠意之作,值得攞獎.
但就咁俾佢橫掃,連音樂獎項都攞埋,會唔會悶啲?
我就覺得呢間金像獎好悶.
其實我唔係好中意啲人屈機,正如我好憎曼聯一樣.
我都有入場睇一代宗師,覺得都拍得好靚,但節奏就太慢,同埋睇葉問都係慣左睇甄子丹,所以唔係咁啱我.
其實呢套戲應該都唔係太適合後生一輩,網上反應都一般.
結果橫掃十二獎之後,好多人鬧爆,對此我就不予置評了,我相信評審的專業眼光.

但全晚高潮就係最後一個獎,最佳男主角.
可能大家都睇厭了一代宗師得獎,都預料到梁朝偉會上台.
爸媽都斷定係梁朝偉,但我就好希望係其他人(其次大熱就會是張家輝),因為唔想再係一代宗師.
點知,turn out真係張家輝,wow,我內心好高興!正呀!
我諗張家輝得獎,係大部分年輕觀眾全晚最開心的一刻,因為大家都等待著,等待著其他港產片得獎的一刻.
其實我無睇激戰,但我都好高興佢做影帝,yeah!

仲有狂舞派,我都無睇,但知道反應好好,票房好高,都幾厲害.
至於掃毒,原本我諗會得到最佳剪接或者最佳攝影,點知最後都係俾左一代宗師,好sad.
其實今年真係有好多出色的港產片,十分難得,其他的例如救火英雄,風暴,等等.
其實每套戲攞一個獎,皆大歡喜,我就最happy.
點知,遇上最多好戲的年份,偏偏撞正黎屈機的一代宗師,真係嘥晒.我覺得好可惜.
再等到有咁多出色港產片,都唔知等到幾時.

最後,J下獲提名男主角的造型照吧.

繼續閱讀

2014年4月15日星期二

分析大埔巴士路線重組 下

7/4/14 陰

重溫上半部分: http://raymondsoso.blogspot.com/2014/04/taipobusroute-1.html



圖片來源: hkitalk.net 香港交通﹒資訊網 https://www.facebook.com/hkitalk.net
重組方案有關大埔路線部分: https://drive.google.com/file/d/0B74wdbnr4y3DNk9XTEI2SUNXUDZ6VTY1YzcwM1hPbnc3NXhr/edit?usp=sharing

307,對於住響市中心的小弟而言,出於私心,自然唔想總站延至太和.
因為總站上車可以揀到心水靚位坐,肯定有窗口位,舒服好多.
而且最主要原因,係我可以較準時間出門,因為307係完全準時開車.
如果大埔中心變成分途站,時間安排上會有偏差.
不過,我承認,現時情況對於太和居民不太公平,所以我都理解政府的做法.
如果方案落實,我唔排除會行去海寶花園,甚至舊墟公園對面等車,以避開大埔中心的人流.
同埋,巴士公司必須留意載客情況,因為新增一大區域的乘客,好多本身搭港鐵出港島的太和居民,一定轉坐307,可能去到文娛中心已坐滿,結果導致廣福邨乘客上唔到車.
建議巴士公司延伸307至太和之餘,必須增加車輛數量及班次,尤其假日.假日總站上層已經坐滿,很誇張.

By the way,關於307,我一直祈求大埔可以增設恆常路線前往港島東區,即係將307P路線變成全日服務.
點解74X咁多人搭,其中一個原因,係因為唔少人搭74X去觀塘轉地鐵去北角.
我自己就係通常係相反方向,東區搭地鐵轉巴士返屋企,貪apm上車有得揀位坐,仲可以順便行下apm.
我就未曾試過於東隧轉車,因為轉車要加錢,好鬼貴,而且上到307都可能無位坐(視乎時間).
其實你搭車經過可以留意下,東隧個站都無乜人用.
我絕對唔相信非繁忙時間無大埔居民需要巴士出東區,而且目前307出港島不經銅鑼灣,對外出購物的乘客極不方便.
我唔需要你好似307咁樣既班次,你俾半小時一班俾我丫,甚至一小時一班丫,好嘛?
就算一小時一班,我保證可以坐到七至八成滿,公司會有錢賺.
如果有區議員成功爭取307P轉全日,我一定會投佢一票.

最後,去到全文重點,亦係我最關注最重視的一項,就係72X改為272X.
72X一直被人怒罵脫班問題嚴重,我每次響新填地街都等到火滾,如果我響旺角道,會直接搭小巴,飛下車仲爽.
九巴改組理據如下:
1.  第72X號線與第271號線均為途經獅子山隧道及九龍塘,往來大埔及油尖旺區的路線,大部份行經的路段完全重疊。
2.  因行經九龍塘窩打老道的繁忙路段,經常受到交通擠塞影響而導致第72X號線的行程超出預定的時間,影響班次的穩定性。
3.  青沙公路提供快速連接新界東及九龍西的道路網絡,唯現時只有數條巴士路線行駛,未能有效利用路面資源。
其實九巴無講錯,72X的確極不穩定,有時九龍啲車返唔切大埔,搞到大埔總站無車開出,人龍就長一長,你話係咪好搞笑.
但我相信改行青沙兜了路,車程上唔會節省到幾多時間,只會方便了前往大角咀或奧運站的乘客.
對於絕大部分於旺角先達或者朗豪坊下車的大埔居民,實質幫助不大.
(其實沙田火車站對開的公路路段經常擠塞,呢一兩年又有修路工程,改行青沙或會弄巧反拙.)
我搭過72X好多次,其實窩打老道並非想像之中咁塞車,反而塞車的路段係太平道勝利道等一段亞皆老街,塞燈位.
至於九龍返大埔方向,塞車路段主要是旺角道一帶,但呢度係乘客上車位置,無法避免.
Anyway,因為72X係常用路線,任何改動都牽連甚廣,我相信九巴係做過research才作出是次決定.
不過,咁樣做,最受傷害會是前往九龍塘的乘客,要改搭271,每程俾多八毫子,並加重271負擔.
72X到底應唔應該改組,我自己都未有答案,但正如政改三人組所講,我沒有既定立場,有機會可以再問下家人朋友意見.
改下路線唔係唔好既,不過好多人都寧願佢唔好改,你睇下之前的路線重組經驗就知,啲人直頭係好似驚九巴會搞佢地咁,大笑.
我好想快啲知這個方案會否通過,但如果通過,相信將來大埔人都只會繼續以72X稱呼新路線,無人會改到口.

嘩,寫呢兩部分巴士路線發展計劃,搞到我好似做左小小的區議員咁,laugh out loud.
不過,如果你係住響大埔,我都好想聽下你個睇法,歡迎提出.因為呢啲事務會直接影響你的生活,實在值得反映.
我就唔係區議員,卻是半個巴士迷.我只係思考一下,路線改動對自己將來有甚麼影響啫,我唔會爭取到行人過路燈加多兩秒,哈哈.
繼續閱讀

分析大埔巴士路線重組 上

7/4/14 陰



圖片來源: hkitalk.net 香港交通﹒資訊網 https://www.facebook.com/hkitalk.net
重組方案有關大埔路線部分: https://drive.google.com/file/d/0B74wdbnr4y3DNk9XTEI2SUNXUDZ6VTY1YzcwM1hPbnc3NXhr/edit?usp=sharing

新界東北巴士路線重組計劃年前已經實施,部分途經大埔之冷門路線曾經改組,對居民影響不大.
不過,現時政府與九巴提出之沙田區計劃方案,就會對大埔有很明顯的影響.

今個階段牽涉大埔之恆常路線有: (特別班次之修訂不在本文討論範圍內)
72 延長至美孚
72A 減班
72X 取消,改為 272X 經青沙直達旺角
74A 取消
307 非繁延長至太和站

整個計劃,備受關注,影響居民最大的相信是72X改組,所以我以下會有較多意見,先講下其他路線.

首先,72延長至美孚,我係贊成的,相信對前往該區的乘客更加方便.
而且荔枝角與美孚距離不遠,車程唔會延伸太多,對班次影響不大.
如果事成,將來我都可以坐車去美孚新邨行下,因為平時唔會特登搭地鐵去果度囉,laugh out loud.
不過,我一直都希望72可以增加班次,因為其實都好多人搭,文娛中心都會出現人龍,而沙田區都會有人上車.
但次次搭72都要等勁耐,唔好彩miss班車,閒閒地等15至20分鐘,搞到啲人要改搭小巴去嘉頓,所以載客量才顯得不足.
繁忙時間就當然更多人搭啦,其實呢條線九巴可以有錢賺,起碼唔會蝕錢先.

72A,大圍行大埔公路返大埔,其實我自己都未搭過,所以都無咩意見,反正唔影響到我.
因為大圍返大埔最直接當然係火車,遊車河先會考慮72A.
不過由於72A負責了接載大埔工業邨乘客出市區,所以調整班次對工業邨的影響值得關注.

74A,呢條路線竟然要取消,我係表示費解和保留.其實網上都有人對九巴提議感到驚訝.
因為呢條線早年已經改動路線,照顧九龍灣其他區域,無諗過咁快就要被取消.
同埋74A肩負起接載新蒲崗乘客回大埔的責任,每晚下班時間,不少人上唔到載滿客的74X,逼住要搭74A.
的確路程會比較迂迴曲折,但總好過無了期等巴士兼無位坐.
同埋我成日諗,可以搭74A直接去Megabox都幾爽,可惜要取消了.
其實我唔明點解呢條路線收費咁貴,仲貴過74X,傻的嗎?你咁貴所以人地咪唔搭你囉.

閱讀下半部分: http://raymondsoso.blogspot.com/2014/04/taipobusroute-2.html



繼續閱讀

2014年4月13日星期日

拾遺童年回憶 vol.11 丁丁歷險記

5/2/14 清涼

拾遺童年回憶 vol.11 丁丁歷險記

20140125_144833.jpg  

或許丁丁歷險記唔算是童年回憶,因為呢幾年我都曾經重溫過家中呢兩部圖書.
丁丁歷險記的吸引力,係就算你長大了,都唔介意繼續再睇.
反正丁丁歷險記一早被改編成電影,證明是老少咸宜的故事.
丁丁真係好好睇,應該話好好笑先啱,隻狗白雪,船長,仲有孖生的警探兄弟,都係戇戇居居,糊里糊塗,好gag.
就連丁丁自己,雖然有良好身手,但都會有撞燈柱或者PK等趣怪遭遇.
好難相信,丁丁一個年輕記者,竟然可以做到咁多野,查到咁多案,有咁多冒險,真係好勁.
不過丁丁實在有太多故事了,多到不能盡錄,我好奈無睇,你問我邊本最好睇,都唔太記得了.
官方正版漫畫,由商務出版,大約是A4至F4 size大,很大本,不過拎上手就覺得很薄,價錢又不便宜,自然覺得唔抵.
所以細個果陣都無乜買過,諗住借圖書館既就算.
其後某年行灣仔渣打書展,見到有大陸書賣,呢本大陸版只售十元,抵到爛,早知買多幾本睇啦.
相信你一定睇過丁丁,不妨留言分享下你印象最深刻係邊一集丁丁歷險記!

繼續閱讀

2014年4月10日星期四

Edelman Visit

3/4/14 陰

又高興再有機會到訪公關公司參觀,今次係全球最大型的PR firm,Edelman.
同benny行到去灣仔中環廣場的大堂,再等齊人上七樓,一入到去,我就shocked了.
因為我見到office裡頭大部分都係西人來的,很意想不到.
同上次一樣,大夥兒坐響會議室,聽部門主管的簡介和分享,聽了約一小時,就出去作簡單參觀.
不過,今次比較特別的,係Edelman真係一間好international好global的firm.
做briefing的有幾個阿head,有香港人,有來自新加坡,仲有個打扮得好ABC的外籍女人,仲有個香港人樣貌但講英文,唔知咩國籍.
至於中途加入的managine director,就係來自澳洲,仲大派卡片,又送了贈言.
嘩,突然之間見到咁多外國人,真係預料唔到,卻是訓練聆聽英文的好機會.
不過佢地講野語速都真係幾快,頗為跟不上,聽得有點辛苦,而且燈光太過柔和,會覺得幾眼瞓幾攰.
anyway,都聽多左唔少野,佢地都係分享少少examples,做過的PR cases等等,但就無上次Weber Shandwick咁有趣.
原來早前IKEA有個瞓教派對,就係佢地搞,呢個concept都幾爆.
Edelman office的牆上掛了幾支龍舟的船槳,刻上了公司的core values,幾中西合壁.
另一邊,則擺設了很多裝飾品,獎盃,相片等等,甚為美觀.
而我最surprise係佢地個pantry,嘩大到呢,colorful到呢...真心羨慕,直頭係個烹飪教室咁既款.
可惜當時裡頭有其他外籍人士開meeting,入唔到去,響出面望兩眼就要轉身走,sosad.
就係咁,結束今日的firm visit,不期然比較兩間firm的分別.
或者咁講,Edelman係非常國際化的公司,加入Edelman,一定有出國發展的機會,大有所為.
Weber Shandwick都係跨國,但感覺上比較local,不過就好似organic啲,有趣啲,無Edelman咁死板咁office feel.
所以,如果俾我揀,我呢隻打算一世縮響香港的虧龜,就一定會揀Weber Shandwick,起碼返工對住個上司係香港人,溝通都無咁辛苦先啦大佬.
唉,講咁多都無謂,因為我暫時都未覺得自己適合做PR,同我性格好似完全唔夾,起碼呢一刻未考慮入呢一個行業.
不過,世事難料,明天的事,誰能知曉?...都是順其自然,隨遇而安吧.
(其實有咩公司搞visit我都有興趣去的,最近參觀兩間PR純屬巧合.)

 10167927_10202495253757457_1076011450_n.jpg  
IMG_2000.jpg
IMG_2014.jpg
 

繼續閱讀

2014年4月6日星期日

Bruno Mars The Moonshine Jungle Tour Live in HK!

30/3/14 一小時內黃雨變黑雨

Bruno Mars為大地帶來雨水,不過我就上了火星聽火星人演唱會,全晚都在火星,感受唔到黑雨的威力.
十點十分返到落黎地球,雖然仍然黑雨,不過雨勢明顯減弱,很快就變回黃雨.
很慶幸,出門和回家時都無落雨,的確很幸運,如果搭遲一班車都死,哈哈.
今次發現原來機場博覽館除了snack bar之外,都有一般野食的,類似主題公園果種形式.
而且,價錢都無主題公園果啲貴得咁離譜,我叫碗叉雞麵(其實都係第一次食叉雞麵,點解會係咁樣配搭呢?).
58蚊一碗,麵的份量一般,但叉燒就好多件,白切雞就好嫩滑,但就好多肥油滲落碗湯.
而且套餐奉送汽水,食完都覺得飽.我真係意想不到響呢度可以食得飽肚!呢58蚊係貴得合理.

入正題,講番演唱會,Bruno Mars The Moonshine Jungle Tour.
本來上年我係有少少興趣買飛睇,不過相比起Avril Lavigne,好似太貴,由於無人陪所以無諗住去.
點知前排鋒鋒bb又話要睇,結果我就人生第一次幫襯黃牛,希望係最後一次.
第一次睇企位,記得上次我大鬧博覽館的保安措施,叫人將飲料斟落膠杯,完全是白痴做法.
今次入場,我用盡辦法,包括掩眼法(笑),將水樽藏到最底,仲用膠袋包住,面頭擺雨傘和紙巾,諗住神不知鬼不覺.
點知阿姐起勢摸個袋的底部,摸了好幾秒,我唔知佢想點,可能佢摸到暗格位置有後備電的硬物,anyway,由於我樣貌太乖太友善太好戲(笑),佢最後都放我入場.
入到場館,即刻拎番水樽和相機出來,嘩哈哈,我成功了,學達哥話齋,太易玩了~~~

20140330_185345.jpg 20140330_193312.jpg DSCN6703.JPG DSCN6705.JPG DSCN6707.JPG DSCN6712.JPG DSCN6717.JPG DSCN6719.JPG DSCN6722.JPG DSCN6727.JPG DSCN6728.JPG DSCN6731.JPG  

其實我個人並不熟悉Bruno Mars,至少我並不迷戀佢.
不過我認為Bruno Mars的確是一個不可多得的出色歌手,有幾首歌我都成日煲.
最愛Locked Out Of Heaven,必聽之作,其他主打歌都好中意.
未開場,觀眾席上已經玩緊人浪.等到八點半,Bruno Mars終於出場了!一黎就唱Moonshine,全場觀眾即刻好high.
因為我事前唔得閒煲熟啲歌詞,所以有些歌都跟唔到,無做定功課很可惜,不過感覺都唔錯的.
不過其實佢既歌語速都幾快,都唔係咁容易catch到,所以都係聽佢唱算.
如果音響方面調較細聲少少,就會較易聽得清楚佢既歌聲.
唔知係咪因為太嘈,我覺得佢把聲有一丁點沙,抑或佢本身把聲係咁.
不過佢都算識搞氣氛,亦很有魅力,全場觀眾都企晒起身,我身邊周圍的人都舉高晒手又un un下(我都有un),隔離幾個大陸豬妹仲跳埋舞.
同埋佢都識得氹fans,扭籮之餘,又叫在場女fans唱"Do You Love Me?",然後好溫柔地回贈一句"Yes I Do."冧死人.

除了Bruno Mars,其八人樂隊The Hooligans都係焦點所在.
尤其我最愛的和音黑鬼Philip Lawrence,好識搞笑搞氣氛,仲響台上玩掌上握.
成班人都咁玩得,唔單止彈奏,仲會拍住Bruno Mars,一齊唱歌,一齊跳舞,真係好正.
我會覺得Bruno Mars唔單止係歌手(singer)或者表演者(performer)咁簡單,而且仲係娛樂家(entertainer).
即係你入場,除了聽佢唱歌外,佢係娛樂緊你,因為今晚真係跳得好開心.
下面有短片,見到佢地咁合拍,觀眾都會好歡喜,好enjoy場show.

DSCN6732.JPG DSCN6735.JPG DSCN6736.JPG DSCN6738.JPG DSCN6739.JPG DSCN6741.JPG DSCN6742.JPG DSCN6743.JPG DSCN6748.JPG DSCN6751.JPG DSCN6752.JPG DSCN6754.JPG DSCN6755.JPG DSCN6756.JPG DSCN6757.JPG DSCN6758.JPG DSCN6760.JPG DSCN6761.JPG  

其實我感受就唔係好多,不過經過今晚,我就更加更加欣賞和傾慕Bruno Mars,我會明白點解啲人會迷戀得發癲.
而且,會覺得佢係一個全能的歌手.自演唱會後,喜歡上Moonshine,Treasure和Grenade.
以前會齋loop Locked Out Of Heaven同埋Just The Way You Are,依家會煲埋呢幾首,已經很入腦,成日會哼住唱.
點解佢會出得兩張專輯咁少,好想佢再出多啲新歌呀!~
我一直都比較愛聽慢歌,但Bruno Mars個style又好似幾適合快歌,當然抒情慢歌佢都演繹得唔錯啦.
啊,仲有一點,就係佢既歌好有八十年代的感覺,但又混合了現今流行的風格,其實真係聽得出,呢一點我十分佩服.
有關今晚演唱會仲有咩特別要講呢?...啊,就係今晚Bruno Mars基本上係一take過,完成所有歌曲,都無換過衫.
而encore部分有Bruno Mars Drum Solo,之前佢隊友的Piano Solo都好勁.
仲有,encore部分係唱Locked Out of Heaven及Gorilla.好正呀,全場最興奮的時刻,全晚高潮所在,因為大家最有共鳴.
冒住被捉風險,冒險拍了部分片段.其實都有唔少人用手機攝錄,不時都有職員響前面舉高電筒照射過來,嘥鬼氣.
其實今晚俾左成幾百蚊咁多入場,得個半鐘咁短,好心場地方面就體諒下啦,又唔係要拍晒全部.
我唔敢明目張膽舉高拍,所以影出來質素唔太好,亦中斷過,要駁番幾段短片,見諒.
相片方面,雖然今次企位,前面好多人阻住視線,亦好唔好彩地企正舉熒光棒既人後面,不過都影到不少清晰的靚相,都算係咁.
今次演員會好多舞台效果,有煙火有紙炮有布幕,好好睇,亦好grand好有feel.
其實呢啲野都唔會太貴,只要有心做其實唔難.所以我覺得呢個安排都好好.

DSCN6763.JPG DSCN6765.JPG DSCN6768.JPG DSCN6769.JPG DSCN6770.JPG DSCN6777.JPG DSCN6778.JPG DSCN6784.JPG DSCN6785.JPG DSCN6787.JPG DSCN6796.JPG DSCN6800.JPG  

如果計時間,我中意Bruno Mars的時間,遠遠不及Jason Mraz.不過兩者style完全唔同,都無得比較.
我不得不承認,黑鬼唱歌真係可以好好聽,轉key可以好smooth,你係好難模仿到.
放了很多片段和相片上來,希望你都可以感受到當晚的氣氛.

Bruno Mars The Moonshine Jungle Tour
Setlist 30Mar2014
Moonshine
Natalie
Treasure
Money (That's What I Want) (Barrett Strong cover)
Billionaire (Philip Lawrence on rap)
Show Me
Our First Time
Marry You
If I Knew (with 'It Will Rain' snippet)
Runaway Baby
The Lazy Song
When I Was Your Man
John Fossitt Keyboard / Piano Solo
Grenade
Just the Way You Are
Encore:
Bruno Mars Drum Solo
Locked Out of Heaven
Gorilla

 

 

DSCN6809.JPG DSCN6811.JPG DSCN6812.JPG DSCN6814.JPG DSCN6816.JPG DSCN6818.JPG DSCN6820.JPG DSCN6824.JPG  

繼續閱讀